تیسری مرتبہ صدر منتخب

وینزویلا میں صدر نکولس مادورو نے تیسری بار صدارتی انتخاب جیت لیا۔

غیر ملکی میڈیا رپورٹس کے مطابق وینزویلا کے انتخابی ادارے کا کہنا ہے کہ 80 فیصد انتخابی نتائج کا اعلان کر دیا گیا ہے، صدر نکولس کو 51.20 فیصد اور ان کے مخالف کو 44.02 فیصد ووٹ ملے ہیں۔

دوسری جانب وینزویلا کی مرکزی اپوزیشن نے کہا ہے کہ وہ انتخابی نتائج کو بڑے پیمانے پر ووٹروں کی فراڈ قرار دیتے ہوئے چیلنج کرے گی۔

وینزویلا میں صدر نکولس کی 11 سالہ حکمرانی کو ختم کرنے کے لیے اپوزیشن نے ایڈمنڈو گونزالیز کو واحد امیدوار کے طور پر پیش کیا ہے۔

صدر نکلوس نے انتخابی نتائج کے بعد اپنے حامیوں سے خطاب کرتے ہوئے کہا کہ ان کی انتخابی کامیابی امن اور استحکام کی ایک اور فتح ہے۔

صدر نکولس نے ملک کے انتخابی نظام کی تعریف کی اور کہا کہ انتخابات انتہائی شفاف تھے، جب کہ اپوزیشن کو آڑے ہاتھوں لیا اور اسے صریح فراڈ قرار دیا۔

دوسری جانب امریکی وزیر خارجہ نے انتخابی نتائج پر شکوک کا اظہار کرتے ہوئے کہا کہ امریکا کو انتخابی نتائج پر شدید تشویش ہے، یہ نتائج وینزویلا کے عوام کی امیدوں کی عکاسی نہیں کرتے۔

تاہم، صدر نکولس کی حکومت کے قریبی اتحادی کیوبا نے انتخابی نتائج میں کہا کہ لوگوں نے کہا کہ انقلاب جیت گیا ہے۔

میڈیا رپورٹس کے مطابق، وینزویلا کی اپوزیشن نے ووٹوں کی گنتی کے دوران اپنے ووٹوں کی گنتی کی نگرانی کے لیے اپنے ہزاروں افراد کو پولنگ اسٹیشنوں پر تعینات کیا۔

تاہم، اپوزیشن امیدوار کے ایک اسپیکر نے کہا کہ ان کے لوگوں کو ملک کے کئی پولنگ اسٹیشنوں سے زبردستی بے دخل کیا گیا۔